Alumnado de 2º ESO
Só poderá incorporarse á FP Básica se, de forma excepcional, é proposto polo equipo docente e polo Departamento de Orientación. É obrigatorio elaborar o consello orientador e contar coa autorización da Inspección Educativa.
Quen pode incorporarse á FP Básica?
As vías de acceso dependen da situación académica da persoa solicitante.
Alumnado escolarizado en ESO
2º ESO
Debe ter 15 ou 16 anos, ou facelos no ano natural de inicio do ciclo. Só pode acceder se é proposto excepcionalmente polo centro e autorizado pola Inspección Educativa.
3º ou 4º ESO
Pode solicitar por petición propia, xunto cos pais, nais ou persoas titoras legais, a incorporación a un ciclo de grao básico.
Outros casos
Persoas non escolarizadas
Poderán solicitar se cumpren os requisitos legais: non posuír título de FP nin outro título que acredite a finalización de estudos secundarios completos e ter, como máximo, 20 anos no ano natural de inicio do ciclo.
Alumnado xa matriculado en FP Básica
O alumnado que repita 1º curso no mesmo ciclo e centro ten praza garantida. O alumnado que promocione a 2º curso ou repita 2º tamén ten praza garantida no mesmo ciclo e centro.
Como se presenta a solicitude?
A solicitude non a presenta a familia directamente na aplicación: o centro correspondente recolle os datos, carga a solicitude e entrega un resgardo.
2º ESO
Proposta do centro
- O equipo docente e Orientación propoñen o alumnado susceptible de incorporarse á FP Básica.
- Elabórase o consello orientador e cárgase en CiclosAdmisión.
- A Inspección Educativa autoriza ou rexeita individualmente cada proposta.
- O centro informa á familia e solicita o consentimento.
- Se hai consentimento, o centro carga a solicitude.
3º ou 4º ESO
O alumnado de 3º ou 4º ESO pode solicitar por iniciativa propia a incorporación á FP Básica. A solicitude preséntase no centro de orixe, que facilitará a documentación, asesorará no proceso e cargará a solicitude en CiclosAdmisión.
Non escolarizado/a
As persoas non escolarizadas deben presentar a solicitude no centro onde se oferta o ciclo do seu interese. Se a persoa solicitante é menor de idade, a solicitude deberá estar asinada polo pai, nai ou persoas titoras legais.
Documentación básica que se carga coa solicitude
DNI / NIE
Documento oficial de identidade da persoa solicitante.
Discapacidade, se procede
Certificado cando se participe pola reserva de prazas e sexa necesario achegalo.
Consello orientador
Obrigatorio para alumnado de 2º ESO proposto polo centro.
Calendario do procedemento 2026/2027
Datas principais segundo as instrucións xerais para a admisión en FP Básica.
Relación inicial 2º ESO
10 xuño 9:00 - 15 xuño 14:00
Carga en CiclosAdmisión xunto co consello orientador.
Inspección Educativa
16 e 17 de xuño
Revisión e autorización da relación inicial.
Solicitudes alumnado ESO
22 - 30 de xuño
Desde as 9:00 do día 22 ata as 13:00 do día 30.
Solicitudes xerais / non escolarizado
15 xuño 9:00 - 30 xuño 13:00
Carga polos centros
Ata o 30 xuño ás 14:00
Resolución provisional
3 de xullo
Reclamacións
3 xullo 9:00 - 7 xullo 13:00
Resolución definitiva e adxudicación
10 de xullo
Matrícula 1ª adxudicación
10 xullo 9:00 - 31 xullo 13:00
Adxudicación, matrícula e prazas liberadas
Se se obtén praza, é obrigatorio formalizar a matrícula no prazo. Non facelo implica perder os dereitos sobre esa praza.
Adxudicación única
O día 10 de xullo poderase consultar a resolución de prazas adxudicadas. A matrícula das persoas con praza adxudicada debe realizarse desde o 10 de xullo ás 9:00 ata o 31 de xullo ás 13:00.
O alumnado escolarizado na ESO manterá a súa matrícula na ESO mentres non formalice a nova matrícula no ciclo de FP Básica.
Adxudicación continuada
Se quedan prazas vacantes, os centros realizarán chamamentos telefónicos seguindo a listaxe de espera. Para cada persoa realizarase un mínimo de tres intentos de chamada separados por media hora.
Se a persoa acepta a praza, terá 24 horas para entregar a documentación necesaria e formalizar a matrícula.
Prazas liberadas
A Dirección Xeral de Formación Profesional poderá determinar ciclos con prazas liberadas por teren vacantes e careceren de listaxe de espera. Estas prazas poderán permanecer liberadas ata o 25 de setembro ás 13:00 e cubriranse por estrita orde de chegada das solicitudes de matrícula, sempre que se cumpran os requisitos de acceso.